A kem-ǧǧeɣ yewweḍ-ed lawan
Ḥrez iman-im seg yiɣeblan
Sliɣ mi d-yessawel zzman
Yerza-d lehlak a yi-iddmen
D mmi, d mmi, d mmi
Ara m-d-ǧǧeɣ d ccan
Mi a neṭleɣ
***
Ḥader lɛid smekti-yi-d
Ff temḍelt-iw bedd ḥku-yi-d
Ma d mmi, ma d mmi, ma d mmi
Ttxil-em ur tettu
Ttawi-ti-id
***
A kem-weṣṣiɣ ṛebbi-t-id
Ilaq ass-a ggall-iyi-d
Baba-s, baba-s, baba-s
Ma yebɣa at-yewɛu
Sedhu-t-id
***
Mi meqqer xas fekker-it-id
Aẓekka-w senɛet-as-t-id
Ass-nni, ass-nni, ass-nni
Xas ad iru
Tṛebbaḍ-t-id
***
Mi twalaḍ tectaqeḍ udem-iw
Allen n mmi-m cbant allen-iw
Mi t-mmuqleḍ, mi t-mmuqleḍ, mi t-mmuqleḍ
Ad am-d-iban
Lexyal-iw
***
Ttxil-em ṣṣerɣ lewṣayef-iw
Am wakken ara yɣab lateṛ-iw
Ma ulac, ma ulac, ma ulac
A kem-ḍebɛent lemḥan
N lmut-iw
***
Yekkumaṣi a yneqqes yeẓri-w
A m-iniɣ lebɣi n lebɣi-iw
Abrid, abrid, abrid
Uẓekka a d-ittban
Ger wallen-iw
***
Asemmiḍ ikcem aksum-iw
Awal a yettecceḍ deg yimi-w
Ṭṭlam, ṭṭlam, ṭṭlam
Yerra-d taduli
Ff wussan-iw
***
Uqbel ad medlent wallen-iw
Ttxil-em qbel-ed lebɣi-w
Tamḍelt, tamḍelt, tamḍelt
N yemma ad tili
D lǧaṛ-iw
***
Tezwar a tt-telḥeq tikli-w
Icedha-tt ula d ṛṛuḥ-iw
Ddaw n tmedlin, ddaw n tmedlin, ddaw n tmedlin
Wiss ma a d-tilli
S idis-iw
***
