Lounes Matoub – Tiɣri idurar
S ucewwiq
Axxam aqdim wi t-yebnan
Ay ay wi i as-yezlan
Asfel mi yuli llsas-is
Baba-k ɣeḍlen-t s laman
Ur ak-t-mlan
Asmi tettnadiḍ lateṛ-is
S cna
Siked kan legṛad i asen-fkan
I wid yeddmen rruḥ-is
Ma d keččini fkan-as leɛlam
Deg yizenqan ttzuxxu yis-s
(*2)
***
S ucewwiq
Iqdimen nnuɣen xesren
Ay ay kellxen-ten
Asmi llin tabburt i ccerq
Deg unnar deg i ttmettaten
Ay qeblen
Rran aɛrab d imsewweq
S cna
Wigini terram d atmaten
Ad zzin a3rur i lheq
Ma mazal tettamnem yis-sen
Nekkini ffɣeɣ d amnafeq
(*2)
***
S ucewwiq
Tidett ɣeḍren-tt yimawlan
Mi tt-fkan
Ɣer lbaṭel tedda d tislit
Arrac ḥeffḍen ur ẓran
Ayen uran
Seg uyeffus a gma senṭeq-it
S cna
Wigini yeṭṭfen imukan
Wid i ten-yuklalen qlilit
Ihi ma ttuɣ ayen iɛeddan
Yemma mačči d taqbaylit
(*2)
***
S ucewwiq
Amek akka ara as-geɣ leqrar
I uɛeṭṭar
Yeččan tigemmi n yimawlan
Ass-agi cebbḥen i lɛar
Am lefnar
La ttwalin yis-s iberdan
S cna
Ma walan yekker-s ccaṭer
Ad t-ɣeḍlen qbel ad d-ban
Ger-asen Aqbayli ma yeẓwer
Ad xellsen win ara t-yerf(ɛ)en
(*2)