Aken kan i d-ṭṭaxxreɣ
Tecɛel tmes deffir-i
Tcehhdem s lbaṭel annaɣ
Tezzim-d d aqawsas fell-i
D aɣrib waqila ara mmteɣ
Tanṭelt-iw di lbeṛṛani
A yemma yis-m nedheɣ
Ajenwi a d-yettaẓ ɣur-i
Tamurt-iw ur tt-ẓerreɣ
Lfinga tegguni-iyi
Ff wayla-nnwen xuḍi i ttnaɣeɣ
Tagara tenḍlem-iyi
Ɣliɣ ger tergin ḥeṣleɣ
Ulac wa ynadin fell-i
D ṭṭlaba n medden ay bubbeɣ
Asni akka tɛedda temẓi
S lḥif tzerɛem-d ar yiri-w
Teggullem ur zziɣ s axxam
Xulfeɣ i yemma lhem-iw
Tettṛaǧu ard yekkes ṭṭlam
I yi-iɣedren d irfigen-iw
Rran fell-i aɛdil n ṭṭlam
Imi ttnaɣeɣ d yiman-iw
Ad yeched yid-i leqlam
Iɣeblan sdukkleɣ-ten
Aɛwaz yezga d amwanes
A tamurt-iw aɛzizen
Abrid ar ɣur-em yenxes
D irfiqen-iw i yi-izzenzen
Ma ṛuḥeɣ a d-tezher tmes
Ɣef lḥif cudden-iyi allen
I wakken a yi-d-yessimes