Catégorie : Lounes Matoub

Ẓriɣ acu i kem-iceɣben
Ẓriɣ ssebba n lqerḥ-im
D nekk i d-am-iḥeslen
Am tiẓẓit daxel n tyersi-m
Tebɣiḍ am nekk am medden
Ad sɛuɣ wi ara yi-ibedden
Tḥulfaḍ iqerb-d wass-im
Tebɣoḍ aẓar-iw yeddren
Ad d-iger ijeǧǧigen
Akken isem n baba ad d-yeqqim
***
Tebɣiḍ ad yi-d-teldiḍ tabburt
Ad waliɣ lerbaḥ yeffren
Tebɣiḍ ad cerrgeɣ tagut
Ad d-baneɣ ger yilmeẓyen
Tebɣiḍ ad timɣur terbut
Ad tesɛuḍ tislit d ttbut
Ad am-tessenqes leɣbayen
Xas ad am-d-teḥḍer lmut
Teẓriḍ tesɛiḍ tameṭṭut
Ara am-yemḥebbaken ɣef lekfen
***
Tuɣaleḍ d taḍsa i medden
S-yis-i i am-ufan tabburt
Yezga uḍar isewɛed-ikem
Aṭṭan mačči d amaynut
Qqaren-as d mmi-s i itelfen
Yeggul lewqam ur t-yexdem
Lxir i as-texdem yettu-t
Yeǧǧa-tt di tesga tuḍen
Ur tesɛi wi ara as-id-yagmen
Tectaq aman di tefsut
***
Ad ɛefseɣ kan ɣef wul-iw
D ayen n dir neɣ d ayen iṣfan
A yemma ad am-seddqɣ temẓi-w
Xḍeb-iyi-d tin i am-yehwan
Ma tekkreḍ yekker sseɛd-iw
Ma teɣliḍ yeɣli lǧehd-iw
D kemm i d itri n wuḍan
Xas ad tceqqeq ddunit-iw
Ad tent-aɣeɣ di zzwaǧ-iw
Tezwar lǧetta-m yeɛyan